काठमाडौं महानगरद्वारा साढे नौ अर्ब राजस्व संकलन, घरबहाल करबाट मात्रै उठ्यो तीन अर्ब बढी

काठमाडौं : काठमाडौं महानगरपालिकाले चालु आर्थिक वर्षको ११ महिनामा साढे नौ अर्ब रुपैयाँ राजस्व संकलन गरेको महानगरले जेठ मसान्तस्म्म ९ अर्ब ६९ करोड ९२ लाख २२ हजार रुपैयाँ राजस्व संकलन गरेको हो । 

उक्त रकम गत वर्षको सोही अवधिको तुलनामा ७.७९ प्रतिशतले बढी हो । गत वर्षको सोही अवधिमा महानगरले ८ अर्ब ९८ करोड ६० लाख ५५ हजार रुपैयाँ राजस्व उठाएको थियो । 

महानगरले चालु आवका लागि १५ अर्ब ११ करोड ४३ लाख ४१ हजार रुपैयाँ बराबरको राजस्व संकलन गर्ने लक्ष्य राखेको थियो । यस अवधिमा महानगरले लक्ष्यको ६४.१७ प्रतिशत राजस्व संकलन गरेको छ । 

महानगरका अनुसार चालु आवमा सम्पत्ति कर शीर्षकमा ९९ करोड ५३ लाख ५४ हजार रुपैयाँ संकलन भएको छ । महानगरले घरबहाल करबाट सबैभन्दा बढी तीन अर्ब छ लाख ५८ हजार रुपैयाँ रहेको छ । महानगरले ३१ वटा शीर्षकमा राजस्व सङ्कलन गर्दै आएको छ । 

जेठ मसान्तसम्म महानगरले पर्यटन शुल्कबाट १७ करोड ८८ लाख ८ हजार रुपैयाँ, पार्किङ शुल्कबाट एक करोड २१ लाख ४८ हजार रुपैयाँ, घरजग्गा रजिष्ट्रेसन दस्तुर एक अर्ब ४१ करोड ४३ लाख छ हजार रुपैयाँ र अन्य सेवाशुल्कबाट १६ करोड ७० लाख ३९ हजार रुपैयाँ राजस्व उठाएको छ ।

यस्तै महानगरले नक्सापास दस्तुरबाट ३६ करोड ८३ लाख ७० हजार रुपैयाँ, व्इवसाय रजिष्ट्रेसन दस्तुर ५८ करोड लाख ३१ हजार रुपैयाँ र प्रशासनिक दण्ड जरिवाना र जफतबाट ४ करोड ४३ लाख ८८ हजार रुपैयाँ रहेको छ ।